Sońǵy úsh kúnnen beri Reseı prezıdenti Vladımır Pýtınniń Ózbekstanǵa sapary jaıly búkil BAQ pen ınternet kózderi jazyp jatyr. Rasy kerek, ózbekter bul kezdesýge buryn-sońdy bolmaǵan dárejede daıyndaldy. Basqa emes, áýejaıǵa prezıdent Mırzıaevtyń ózi baryp Pýtındi kútip aldy. Biraq Pýtınniń mysy basty ma, bilmeımin, Reseıdiń ánurany oınalar sátte ózbek prezıdenti qolyn keýdesine aparyp qoıdy. Al Pýtın bolsa, miz baqpaı tura berdi. Óz áreketine uıalǵan bolýy kerek, sodan keıin ǵana baryp, Mırzıeev qolyn tómen túsirdi.
Aidos Sarym óziniń Feısbýktegi áleýmettik paraqshasynda osyǵan qatysty bylaı dep jazdy:
...Aýrý qalsa da, ádet qalmaıdy degen osy-aý!
Keshe Pýtındi qarsy alyp jatqan kezde "Soıýúúz nerýshıımyı..." dep gımndetip jatqan sátte, Myrzıeev avtomatty túrde qolyn júregine qoıyp jatyr. Sosyn «osy tirligim artyq bolyp ketken joq pa?» degendeı qarnyn sıpaǵandaı qolyn túsire saldy.
Sasyp qalǵan sıaqty, aǵaıyn aǵamyz.
...
«Gımndetip» júrip, sol «soıýzge» kirip ketpese boldy!»
Pýtınniń pátýasy – 20 kelisim jáne 2 mıllıard dollar
Sapar barysynda 20 kelisimge, qarjylaı aıtqanda, 2 mıllıard dollar turatyn saýda-ekonomıkalyq ınvestısıalyq qujattarǵa qol qoıyldy. Taıaýdaǵy ýaqytta orystar ózbek ekonomıkasyna osynshama qarjy quıatyn boldy. Endi myńdaǵan ózbek talapkerleri Reseıdiń joǵary oqý oryndarynda oqıdy. Sapar barysynda sarapshylardyń eń nazaryn aýdarǵan joba orystar ózbek jerinde atom elektr stansasyn salady. Atalǵan kelisimniń ishindegi eń irisi de osy bolyp otyr. 2028 jylǵa deıin salynatyn bul eń iri ınvestısıalyq jobanyń tıimdiligi mynada: atalǵan stansa iske asatyn bolsa, Ózbekstannyń energetıkalyq salasy damıdy, syrtqy elderge qýat kózderin eksporttaıtyn bolady.
Ózbekter qazaq bıliginiń aldyn orap ketti
Bul oraıda ózbek bıligi Reseımen mámilege kelý arqyly Qazaqstannyń aldyn orap keteıin dep tur. Al bizdiń bılik «armandap» otyrǵan reseıliktermen AES salý jobasy áli qolǵa alynǵan joq. Qazaq bıligi elde atom elektr stansasyn salýdy 2013 jyly bastap kóterip keledi. Bul týraly prezıdent Nazarbaev arnaıy tapsyrma bergeni de belgili. Tipti sol kezdegi Energetıka mınıstri Vladımır Shkolnık AES Aqtaý qalasynyń tóńireginen, Shyǵys Qazaqstan oblysynyń Kýrchatov qalasynan nemese Balhash kólindegi Úlken poselkesiniń mańaıynan salynatynyn da aıtqan. Alaıda munyń barlyǵy da osy kúnge deıin qaǵaz júzinde qalyp keledi. Munyń sebebi nede? Ózbekstan Ǵylym Akademıasy tarıh ınstıtýtynyń qazirgi zaman tarıhy jáne halyqaralyq zertteý bóliminiń meńgerýshisi Ravshan Nazarovtyń aıtýynsha, «munyń eki sebebi bar. Birinshiden, qazaqstandyq sheneýnikterdiń energetıkalyq problemalardy sheshýdegi belsendiligi tómen. Ekinshiden, osy ýaqytqa deıin Semeı, Kapýstın Iar, Embi, Saryshaǵan polıgondarynyń zardabyn tartyp kelgen qazaqstandyqtarda atom elektr stansasyn salýǵa qatysty qatty alańdaýshylyq bar. Sondyqtan da Qazaqstanda bul joba qaǵazbasty kúıinde qalyp otyr. Reseılikterdiń ózbek jerinde AES salýǵa qatysty áńgimesinen keıin Qazaqstanda da belsendilik paıda bolýy múmkin».
♦Mırzıeevtiń AQSH-qa sapary: Tramp ózbek basshysyna qandaı ýáde berdi?
